Minangkabau Posted by mamBang on 04:20 No comments

Apo itu Minang?? Apo itu Minangkabau?? Sobab esey nih orang Minang, kalau nak ikutkan worieh Slomak Pahang sobab ikut an bolah omak esey haa. Bolah abah esey lain suku eh .. Tompi selamo esey nih berdarah Minang, tak ponah pulak esey tau apo disebalik Minang? Yang esey tau apo tu Minangkabau.

Perkataan Minangkabau adolah gabungan duo perkataan, Minang yang bermaksud "Monang" dan kabau umpuk "kerbau". Menurut lagenda, namo ni diamik dari peristiwo perselisihan antaro kerajaan Minang (waktu tu bolun Minangkabau) dongan sorang putro Jawo yang ondak an pengakuan kekuasaan di ranah Minang. Umpuk elak an daripado beporang, rakyat Minang mencadangkan pertandingan adu kobau antaro keduo pihak. Putro tesobut setuju dan menonjolkan sekor kobau yang bosa dan ganeh. Aiyo osah bosa eh kobau Jawo nih gadang anak gajah tu haaa .. tanduk eh melongkung sebolah duo tigo dopo.

Mano nak cari kobau segodang tu kek ranah Minang. Puehlak ke sanun ke mari takdo yo nak celen kobau Jawo tu. Pueh dek eh. Kalau korang pon agak eh buntu yo tak. Apo aka eh? Akhirnyo ateh nasihat Tok Pepatih Nan Sebatang tu, digunokanlah sekor anak kobau yang lapar tak dibagi makan minum 3 hari. Dilokek an pulak sundang mato duo yang amat tajam kek kepalo anak kobau tu. Masa pertandingan, dilopehkan anak kobau lapar tekuak-kuak nak minam. Ayo lapar bona laa kan.

Sundang

Kobau Jawo nih tak pulak sampai hati nengok an anak kobau. Yang si anak kobau ni pulak tengok kobau Jawo tu ingek eh ibu eh..menonong toruih celapak colah klangkang kobau Jawo nak minam haus lapar. Di biar eh dek kobau Jawo nih. Apo laie sodapla anak kobau nih nyonyot tolo kobau Jawo, ingat eh susu ibu eh.

Korang ponah tengok camano anak kobau, kambing atau lombu nyusu tak? Di agah², disondol² kepalo eh bilo nyusu. Apo laie dirodok sundang ke porut kobau Jawo tu nak cari puting susu tompi yang dikicap eh tolo kobau Jawo..heehee. Tebolah-tebolah porut kobau Jawo tu dikojokan. Last skali mampuih kobau Jawo tu.

Putro Jawo tu tak puehati. Kato eh orang Minang main cenekey. Apo pulak. Kobau Jawo tu umang aih gadang usah koba an. Tanduk eh yo sebolah duo tigo dopo. Kalau duo tanduk camano lebar eh, melongkung lak tu. Kobau Minang alahai kocik tet yo, tanduk eh pon satu yo. Last skali putro Jawo tu ngaku kalah. Selamatlah ranah Minang dari ditakluk Jawo.

Sobab tu Minangkabau amik sempono "Menang Kobau". Sebolun tu, panggil Minang yo. Sobab apo dipanggil Minang? Tau tak worieh yang tebaco ni? Sobab monang(menang)? Tau tak nih? Jangan nak mongak kalau tak tau. Gholo dek eh.

Minang diamik dari 2 perkataan iaitu "Kami"+"Menang". Jadilah Minang. Apo bondo eh kami monang nih? Tau tak? Ponah donga tak pepatah Minang - Alon yo laie ado Nabi Muhammad, ranah Minang dah Islam dulu. Camano tu? Kalau dapek ungkaikan .. taulah kito apo makno eh Minang tu. Heehee .. cubolaa tanyokan kalau tak tau. Esey pon baru jo tau haa. Tu pasal esey lotak kek sini .. kito orang Melayu kan .. kono tau sapo kito, usahlah nak raso rondah diri laie dari bangso lain yo.

Read More »

Ondak Refleks Posted by mamBang on 17:33 No comments

Korang ado raso nak pitam? Ado darah tinggi? Koncing Manih? Kalu tawar takpo doh. Ado sakit jantung? Ado raso ndak seleso? Yang paling kian kini eDen tengok an .. tuhaa yang Muhammad Ali kono tu, satu dunio dio poie cari ubek eh, ndak do yo dapek. Apo namo eh .. Parkinson. Insya Allah dapek yo diubek an dengan Refleksologi. Refleksi caro bori tokanan kek kaki ngan tangan, khusus dan teknik tangan tanpo guno minyak, krim atau lotion berdasarkan sistem zon dan daerah refleks yang menceghominkan imej tubuh pada kaki dan tangan dongan premis bahawo kosan bekojo perubahan fizikal dalam tubuh. INI KURANG TOPAT!

Apolak eDen kato kurang topat? Kalau toruih kito guno an ibujari, berkemungkinan kito akan melecet an kulit, bertoruihan menusuk akan membuko sorat² otot dan menyobabkan angin melomahkan struktur sorat itu sendiri. Sebelum kito pergi lobih jauh, eDen ndak mau menokankan pado kobenaran tulisan eDen ni. Kerano pelajaran itu mereko ambik, ado yang belajar dari orang yang memang khusus dalam refleksi ini dan ado yang belajar dari buku dan ado yang belajar dari tengok² dan ado yang kononnyo tahu apo itu refleksi. Tau tak refleksi yang paling tinggi ponah eDen dongar adolah memogang anggoto badan yang sakit tanpo memicit, menokan, tompi cukup sekadar menyapu dengan tangan di tompek yang sakit. Bak mengolap air ateh mejo ngan kain dan dicampak buang. Itulah refleksi tahap tinggi yang hanyo bergantung pado hakikat manusio dan makrifatullah.

Apa untungnya buek refleksi ni? Beberapo jonih penyakit dapek diubati seperti Ghout, Darah Tinggi, Lumpuh, masalah Jantung, Paru-paru, Buah Pinggang dan yang terkini adolah penyakit Parkinson serto beberapo penyakit lagi. Cumo yang ndak buleh eh Pak Aries tu kato .. yang takdo tangan ngan kaki yo .. heehee

Akan eDen kombangkan sikit² pasal refleksi ni sobagai pengetahuan umum jo. Kalau nak tahu lobih silolah bertanyo pado pakar reflexologi .. kalau bonar orang itu pakar, bukan ikut²an, bukan baco pado buku. Kalu nak tanyo kek mano kek eDen .. buleh eDen rekomen an pado orang yang dah 30 tahun pengalaman eh .. namo eh Pak Aries Chan. Orang Minang juo .. woghieh heehee

Read More »