Menggalas Adat Minang Posted by mamBang on 15:33 1 comment

Pepatah Minang

Barek samo dipikua, ringan samo dijinjiang

Bakato bak balalai gajah, babicaro bak katiak ula.
Suatu pembicaraan yang tidak jelas ujung pangkalnya.

Bak ayam lapeh malam, bak kambiang diparancahkan.
Seorang yang kehilangan pedoman hidup serta pegangan, berputus asa dalam sesuatu.

Bak kabau dicucuak hiduang umpamo langgau di ikua gajah.
Seseorang yang selalu menurut kemauaan orang lain, tanpa mengeluarkan pendapat hatinya

sumber : lobaipas.blogspot.com

Elok nagari dek panghulu, elok tapian dek nan mudo, elok masajik dek tuanku, elok rumah dek bundo kanduang.

Baik suatu negari karena pimpinannya, begitupun Masjid, tepian karena pemuda pemudi yang tinggi budinya

Walupun begitu, hanya golongan tertentu saja di N.Sembilan yang masih mengekalkan adat pepatih..iaitu golongan adat dan yang mempunya jawatan dalam adat tersebut, seperti Yam Tuan, Lembaga, Buapak dan sebagainya. Bagi golonga muda yang kebanyakan telah terdedah dengan arus permodenan malah pemahaman yang lebih baik tentang Agama, maka adat tesebut telah semakin dilupakan. Jika ada sekalipun contohnya pada upacara perkahwinan, dijemput juga ketua adat tersebut sebagai menghormati mereka.

Tidak dinafikan adat pepatih sebenarnya adalah diambil dari hukum islam itu sendiri. Kecuali beberapa perkara ditambah untuk kesesuaian dan untuk kebaikan mengikut suasana ketika itu.

Cuma yang tidak berapa betulnya, Agama telah dijadikan adat, maka setiap perbuatan yang bersandarkan adat dengan sendirinya telah tertolak. Walau ia dicedok dari agama Islam itu sendiri, sebagai orang islam, kita mestilah melakukan sesuatu kerana ia adalah suruhan agama dan bukan suruhan adat.

Maka pepatah yang mengatakan biar mati anak jangan mati adat perlu dikaji semula..

Malah prinsip adat pepatih yang mengatakan 'lelaki menyandang saka' perlu diperjelaskan lagi kerana menurut kefahaman kini, saka adalah Jin belaan keturunan yang menyesatkan.

Ramo-ramo sikumbang jati

Katik endah pulanga bakudo

Patah tumbuah hilang baganti

Pusako lamo baitu pulo

Bak kato pantun bebudak mudo pilah..

Kobau tuo ilang di sawah,

Urang kampung pueh menchaghi,

Kok ekau tokan kepalo kobawah,

Sahlah ekao la kobau yang den caghi..heh heh

ekao ngan kobau samo yoo... padan muko pado sapo yang baco..

'bajalan paliharolah kaki, bakato paliharolah lidah'

Gilo boto satu hari suntok den nak siap an tajuk nihh.. intenet macam hampeh.. ponek den. Ghaso nak toghojun yo lam sawah.. bekubang sobolah kobau..

'Aia diminum raso duri, nasi dimakan raso sakam.'
air diminum rasa duri, nasi dimakan rasa sekam.

Buruak muko camin dibalah
buruk muka marahkan cermin

SALAM JO SAMBAH KAMI

Kapado niniak mamak yang gadang basa batuah,pucuak bulek jo urek tunggang,
Nan gadang diajuang tinggi diamba gadang.
Kapai tampek batanyo, ka pulang tampek babarito.
Nan bak umpamo kayo gadang di tangah koto.
Urek nanbuliah tampek baselo, batang gadang tampek basanda.
Dahan kuek buliah bagantung,
Daun rimbun buliah balindung,
Buah labek dapek dimakan. Tampek balindung kapanasan,
Tampek bataduah kahujanan. nan bakato bana.
Aiei janiah sayaknyo landai, ikan jinak hukumnyo adie.
Ka ampek suku dinagari, nan manjunjuang sako adat,
Bilo maulana jo tuangku, nan tahu dihalal jo nan haram,
Sarato sah jo nan batua, suluah dendang adat limbago.
Hulu balang jo ampang limo, jo manti pagawai adat,
Nan bak umpamo pagaran kokoh. Cadiak jo tahu pandai,
Nan arief bijaksano, tahu diangin nan basuruik,
Tahu diombak nan basambuang, sarato dahan kamaimpok,
Runciang kamancucuak, tahu dialamaik kato sampai,
Alun bakilek lah bakalam, takilek ikan dalam aiei,
Ikan takilek jalo tibo, tantu jantan batinonyo.
Nan mudo pambimbiang dunie,
Nan capek kaki ringan tangan,
Capek kaki indak panaruang, capek tangan indak mamacah,
Aso tarantang duo sudah, nan bahati suci bamungko janieh,
Nan tahu dimalu jo sopan, sarato raso jo pareso,
Ancang ancang dalam nagari. Sarato kapado bundo kanduang,
Limpapeh rumah nan gadang,
Sumarak dalam nagari hiasan dalam kampuang,
Nan gadang basa batuah, kaundang-undang ka Madinah,
Kapayuang panji kasarugo.
Sarato jo urang banyak,
Nan tidak baimbau namo sarato basabuik gala,
Nan dilingkuang barieh jo balabeh, didalam cupak jo gantang,
Dikanduang adat jo pusako. Ujuik tujuan buah rundiang,
Sakiro paham dikahandaki, bahubung jo maso nan ditampuah,
Musim nan tumbuah iko kini, syariatnyo ado bahakikat,
Lahieh kulik manganduang isi. Lahieh manjadi buah ama,
Dek enggeran sako nan tatagak, Koto aman alam santoso,
Salamaik korong jo kampuang, nak aman anak kamanakan.
Dunia buliah akhirat dapek, sinan mardeko mangkonyo panuah.
Curai jo paparan, bukan mahunjuak maajari.
Hanyo sakadar calak calak ganti asah.
Kok salah mintak dibatua kan, kok panjang mintak dikarek,
Senteng mintak dibilai, kok kurang mintak ditukuak.
Karano ulemu di Tuhan tasimpanyo. Kito nan bukan cadiak pandai.

Read More »

Suku Keluarga Woghieh Posted by mamBang on 14:59 No comments

Di Negeri Sembilan terdapat 12 suku atau keluargo dinyatokan dalam sobuah gurindam yang berbunyi

Raja beralam, Penghulu berluak, Lembago berlingkungan, Buapak beranak buah, Anak buah duduk bersuku-suku, Berapo sukunyo? Dua Boleh!

Suku Biduanda/waris (dondo)
Batu Hampar (Tompar)
Paya Kumbuh (Payo Kumboh)
Mungkal
Tiga Nenek
Seri Melenggang (Somolenggang)
Seri Lemak (Solomak)
Batu Belang
Tanah Datar
Anak Acheh
Anak Melaka
Tiga Batu

Apakah Adat Pepatih

Adat dipakai baru, jiko kain dipakai usang

Adat Pepatih berasal dari Ranah Minangkabau, Sumatera, diasaskan oleh sorang pemimpin Minang benamo Sutan Balun yang bergola Dato' Pepatih Nan Sebatang. Adat ini adolah amalan dan peraturan hidup yang ditontukan bagi masyarakat Minangkabau yang rato-rato eh adolah petani ketiko itu. Tak ado tarikh yang topek dicatatkan bilo adat ni diwujudkan. Tetapi Adat Pepatih dibawo ko Semenanjung Tanah Melayu (Semenanjung Malaysia) oleh perantau-perantau Minangkabau pada abad ko 14 Masehi.

Di Malaysia, Adat Pepatih ini masih lagi wujud dan diamalkan oleh masyarakat Melayu di Negeri Sembilan dan sebahagian dari Melaka terutamanya Masjid Tanah. Majoriti mereko adalah keturunan Melayu Minangkabau.

Rang gadih mangarek kuku
Pangarek pisau sirauik
Paruik batuang tuonyo
Batuang tuo elok ka lantai
Nagari ba ampek suku
Dalam suku babuah paruik
Kampuang banan tuo
Rumah batunganai

(anak gadih memotong kuku, dikarek ngan pisau siraut, pisau siraut peraut botung tuo, botung tuo baik untuk lantai, nagari mempunyai ompek suku, dalam suku bebuah porut, kampung betuo, rumah bertungganai).

Masyarakat Adat Pepatih terbahagi kepado tigo kumpulan utamo iaitu Porut, Suku dan Luak. Porut adolah unit sosio-politik yang terkocik di mano anggoto sosuatu porut itu adolah berasa daripado moyang (keturunan perempuan) yang samo. Mereko ini sangat rapat dan lazimnyo tingga di sesuatu pekampungan atau kawasan yang samo. Setiap porut mempunyai seurang ketuo yang digolar Buapak. Buapak ini dipilih oleh anak-anak buah di dalam sesuatu porut berkenaan.

Kumpulan yang keduo ialah suku. Suku dibontuk oleh beberapo porut yang menjadikan keluago bekenaan semakin bosa. Suku diketuai oleh seorang ketuo yang digolar To' Lembago.

Kumpulan ketigo ialah Luak. Luak adalah unit kawasan pentadbiran dari sogi adat di mano ado ompek luak utamo iaitu Rembau, Sungai Ujung, Johol dan Jelebu. Setiap luak diketuai oleh seorang Undang. Selain daripada ompek luak utamo ini ado satu lagi luak yang kelimo dipanggil Luak Tanah Mengandung. Luak Tanah Mengandung ini adalah terdiri daripada lima luak kocik di Seri Menanti iaitu Luak Inas, Luak Ulu Muar, Luak Gunung Pasir, Luak Terachi dan Luak Jempol. Setiap luak kocik ini ditadbirkan oleh sorang ketua yang bergelar Penghulu Luak.

Adat Pepatih ini diwariskan dari generasi ko generasi melalui kato-kato perbilangan. Io merangkumi pelbagai aspek kehidupan masyarakat termasuk soal harto pesako, perlantikan pemimpin, hukum nikah kahwin, amalan bemasyarakat, sistem menghukum mereko yang melanggar adat atau melakukan kesalahan dan pelbagai aspek lagi. Setiap peraturan atau adat itu ado perbilangannyo dan setiap peraturan itu ado rasional atau sobab-sobab terjadinyo hukum atau adat itu.

Perlantikan pemimpin, misanyo, banyak yang menyamokan sistem Adat Pepatih dongan amalan demokrasi. Contohnyo ialah perlantikan Yang DiPertuan Besar Negeri Sembilan di mano bukannya melalui keturunan dari bapo ko anak tetapi adalah melalui pemilihan oleh Undang Luak yang ompek iaitu Undang Rembau, Undang Sungai Ujung, Undang Johol dan Undang Jelebu. Ompek undang ini akan bermesyuarat untuk melantik salah seorang keturunan dari raja Pagar Ruyung untuk menjadi Yang DiPertuan. Undang Luak pula dilantik oleh Dato'-Dato' Lembago di luak (daerah) masing-masing. Dato' Lembago ini pulo adalah pemimpin-pemimpin yang dilantik secara muafakat oleh pemimpin-pemimpin keluargo yang digelar Buapak. Oleh itu secara keseluruhannyo kuasa melantik pemimpin itu sebonanyo berado di tangan rakyat biaso. Inilah satu sistem Adat Pepatih yang ada persamaan dengan demokrasi.

Sakali aia gadang
Sakali tapian barubah
Namun aia kailia juo sakali gadang baganti
Sakali peraturan barubah
Namun adat baitu juo

(sekali air besar, sekali tepian berubah, namun air ko hilir juga, sekali besar berganti, sekali peraturan berubah, namun adat begitu juga).

Adat Pepatih ado limo prinsip utamo
1. Keturunan dikiro melalui nasab ibu: Adat Pepatih memberi keistimewaan kepada perempuan yang dianggap bondo kandung iaitu ibu yang melahirkan anggoto-anggoto masyarakat. Seseorang individu itu adalah anggoto suku ibunya dan bukan anggoto suku baponyo
2. Tompek Kediaman adolah di kawasan ibu isteri: Apobilo belangsungnyo sosuatu perkahwinan, si lelaki akan meninggalkan kampung halamannyo dan menotap di kawasan ibu isterinya sebagai orang semonda. Pado zaman dahulu si lelaki akan mengusohokan tanah keluarga isterinyo
3. Perempuan mewarisi pesako, lelaki menyandang sako: Hanya lelaki sajo yang berhak menyandang sako (jawatan-jawatan dalam adat) manakalo perempuan adolah mewarisi harto pesako keluarga ibunyo
4. Perkahwinan soporut atau sosuku adolah dilarang: Dalam sosuatu porut dan suku, hubungan adolah rapat dan si lelaki menganggap perempuan dalam porut atau sukunyo adalah sedaro perempuannyo. Begitu juo sebaliknyo. Oleh itulah perkawinan sesamo suku ini adolah terlarang. Perempuan yang berkahwin sesamo suku akan hilang haknyo untuk mewarisi harta pesako ibunyo manokala lelaki pulo akan hilang hak untuk menyandang sebarang jawatan dalam adat
5. Orang luar boleh menjadi ahli sosuatu suku: Untuk tujuan perkahwinan atau waris mewarisi, dibonakan orang luar untuk menjadi ahli sosuatu suku dengan caro melalui upacara bokodim. Dalam upacaro ini seseorang itu akan bersumpah taat setio dan besaudaro dengan ahli-ahli suku yang akan disertainyo

Baribu nan tidak lipuah, jajak nan indak hilangSatu ajaran yang tetap berkesan, yang diterima turun temurun.

Hari paneh kok tak balinduang
(hari panas jika tidak berlindung, hari hujan jika tidak berteduh, hari kelam jika tidak bersuluh, jalan lengang jika tidak berteman).

Pembahagian harto
Selalu menjadi topik pedebatan hangat mengenai Adat Pepatih adolah mengenai pemberian harto pesako yang memborian kelobihan kepado perempuan. Inilah satu-satunyo isu dalam Adat Pepatih yang solalu disalah fahaman. Sebonar eh, pemberian pesako yang dimaksudkan dalam adat ini ialah pemberian tanah adat. Tanah adat ini adalah tanah yang turun temurun daripada nenek moyang sesuatu keluargo. Sobabnyo tanah adat ini diberikan kepada perempuan ialah semato-mato untuk menjago kehormatan dan maruah kaum wanita Adat Pepatih. Maksudnya, seorang wanita Adat Pepatih walau betapo miskin dan papa pun, dio tidak akan merempat atau menjual maruahnyo untuk hidup. Jiko dio pulang ko kampungnyo dio sudah ado tanah kampung dan sawah untuk dikojokan sebagai penyambung rezeki. Manokalo anak lelaki pulo dianggap lobih toguh dan tahu untuk torus berusoho untuk hidup (survival). Akan harto atau tanah yang diperolehi sebagai harto sepencarian mako pembahagiannyo adalah menurut hukum faraid (tidak ada kena mengena dengan tanah adat yang hanya untuk perempuan sahaja).

Terdapat juga golongan dari suku minagkabau (keturunan Raja Perba) yang terpakso bepantang, mereko dilarang memakan robung dari buluh betong, tidak boleh makan kerbau balau dan tak boleh kono daun selinsing.

Hari hujan kok tak bataduah
Hari kalam kok tak basuluah
Jalan langang kok tak bakawan

Read More »

Adat Pepatih Posted by mamBang on 14:17 No comments

Kedatangan Adat Pepatih di N.Sembilan

Sejarah kedatangan adat Pepatih ko N. Sembilan adalah berkaek rapat ngan kedatangan peneroko-peneroko urang Minangkabau kerano penyerapan adat itu ko dalam masyarakat di sini selareh dongan kedatangan mereko. Penduduk N.Sembilan kebanyakan mereko berasal dari Ranah Minangkabau di Sumatera Barat. Apabila mereko berhijrah ko negori ni, mereko bawo samo caro hidup dan warisan kebudayaan yang diamakan di negeri asal mereko.

ASAL USUL ADAT PEPATIH
Adat Basandi Syarak, Syarak Basandi Kitabullah.

Menurut sejarahnyo, Adat Pepatih berasal dari Pagar Ruyung Minangkabau, Sumatera Barat, Indonesia. Di namokan Adat Pepatih sempono namo urang yang menyusun dan membuek peraturan adat tersobut. Adat Pepatih di bawo ko Negori Sembilan oleh urang Minangkabau yang merantau ko Tanah Melayu.

Menurut ceritonya, beratus tahun dulu di Negeri Padang Luas, Pagar Ruyung Minangkabau ada duo urang adik beradik yang soibu tetapi berlainan bapa. Yang tua benamo Temonggong atau Datok Temenggong dan adiknya bernamo Pepatih Nan Sebatang atau Datok Pepatih. Bilo keduonyo sudah dewaso mako mereko pun mewarisi pemerintahan negeri Padang Luas.

Walaupun mereko adik beradik tetapi berbezo pendapek terutamo dalam caro pemerintahan. Kerano perbezaan pendapek itu menyobab an selalu bobalah Tok Temonggong ngan adik eh Tok Pepatih. Untuk mengelak tojadinyo pegaduhan mako negori Padang Luas terpakso dibahagi pado duo pemerintahan. Tok Temonggong memerintah bahagian pesisir pantai manakalo Tok Pepatih berkoso di bahagian daratan. Kawasan pemerintahan Adat Temenggong memakai adat yang disusun Tok Temenggong manakalo Adat Pepatih memakai adat yang di susun oleh Tok Pepatih.

Antaro Adat Temenggong dongan Adat Pepatih terdapat perbezaan terutamo dalam soal pembahagian harto pesako. Bagi Adat Temenggong, lelaki lebih banyak mendapek bahagian harto pesako daripada perempuan manakalo Adat Pepatih menyorahkan segalo harta pesako kepado anak perempuan.

Pado suatu hari anjing Tok Pepatih tolah menggigit kaki Tok Temonggong. Akibat eh anjing tu dipukul oleh Tok Temonggong sehingga mati. Ini menimbulkan kemarahan Tok Pepatih. Dia copek bejumpo Tok Temonggong.

"Bukankah peraturan dalam adat temenggong mengatokan , sapo menggigit dio kono gigit?" tanya Tok Pepatih pado Tok Temonggong. Dio merujuk pado adat Temenggong yang mengatokan sapo yang membuek jahek dibaleh jahek yang samo juo.

"Memang bona!" jawab Tok Temonggong.

" Kenapo bilo anjing menggigit kaki awak pukul sampai mati? Sepatut eh bilo anjing tu menggigit kaki awak maka awak gigit pulo kaki anjing tu," baleh Tok Pepatih.

Mendonga kato-kato itu, Tok Temonggong meraso marah lalu berlakulah cabar mencabar antaro keduonyo. Untuk mengelakk an sengketo bepanjangan mako keduonyo besetuju meninggalkan negori Padang Luas untuk membuko negori baru.

Mako Tok Pepatih dan Tok Temenggong pun menyediokan bahtoro masing-masing untuk belayar meninggalkan negori Padang Luas. Konon ceritonyo, bahtoro Tok Temenggong selamat dilancarkan ko laut dan torus belayar. Manakalo bahtoro Tok Pepatih tidak mahu dilancarkan ko laut. Walupun rakyat jelato di suruh beramai-ramai menolak bahtoro tu namun tidak jua dapek bergorak.

Pada malamnyo Tok Pepatih bermimpi bahtoro yang bernamo "Geliong Panjang " tu tidak dapek dilancarkan kerano tolah diduduki oleh "Jin Sakti Muno". Untuk melancarkannyo mako terpaksolah digalangkan di bawah bahtoro tu seurang perempuan bunting sulung (mengandung sulung).

Mako pado keesokan harinyo Tok Pepatih menyuruh urang-urangnyo mencari perempuan bunting sulung. Setelah pueh mencari diserato negori Padang Luas itu mako akhirnya didapati hanya ado duo urang sajo yang sodang bunting sulung iaitu anak Tok Pepatih sendiri dan anak saudaranya yang bernamo Puteri Seri Banun. Adapun Puteri Seri Banun seorang yang baik hati dan sanggup berkorban dengan menawarkan dirinya menjadi penggalang kepado bahtero bapo sedaranyo itu.

Mengikut cerito selanjut eh, Puteri Seri Banun yang sodang bunting sulung itu pun dibaringkan di bawah bahtoro itu sebagai penggalangnyo. Kemudian urang ramai menolak bahtoro itu ko air. Tetapi dongan takdir Tuhan, ketiko bahtoro itu ditolak oleh urang ramai mako satu keajaiban bolaku di mano bahtoro itu terangkek sendiri lalu masuk ko dalam laut. Ado yang pecayo Jin Sakti Muno yang mengangkek dan menolak bahtoro ko laut kerano syarat tolah diponuhi. Dongan ini terselamatlah Puteri Seri Banun dari menjadi korban bahtoro tesobut. Dan sebaik sajo bahtoro itu berjayo dilancarkan mako Seri Banun pun melahirkan seurang anak lelaki lalu di beri namo Batin Menggalang.

Setolah lamo belayar akhirnya Tok Pepatih sampai ko Negeri Sembilan lalu mereko pun mencari kawasan yang sesuai untuk membuko negori. Setolah perkampungan baru berjayo diwujudkan mako Tok Pepatih telah menyusun semulo adat Pepatih untuk disesuaikan dongan keadaan setompek. Antaro peraturan baru yang diguno pakai oleh Adat Pepatih ialah segalo harto pesako ondaklah disorahkan kepado anak perempuan. Ini sebagai mengonang jaso Seri Banun yang sanggup menjadi penggalang bahtoro Tok Pepatih, berkorban untuk bapa sedaronya Tok Pepatih.

Bak kato pepatah

Yang kurik kundi yang merah sago

Yang baik budi yang indah bahaso

Yang baik budi yang dikorah tenago

Yang asyik puji yang mogah harto

Yang tarusik diri yang rosah jiwo

Yang carik hati yang basah mato

Read More »